تعرف على أهم المواصلات العامة بالقاهرة مع دليل شامل للمواصلات
القاهرة من أكبر العواصم في العالم وأكبر مدينة في أفريقيا، ومن أكتر المدن
في الكثافة السكانية في العالم. ومع مدينة عملاقة زي دي
القاهرة من أكبر العواصم في العالم وأكبر مدينة في أفريقيا، ومن أكتر المدن
في الكثافة السكانية في العالم. ومع مدينة عملاقة زي دي لازم شبكة المواصلات تبقى
على قدر الحدث. في المقال ده هـ نحاول نوضح إزاي تروح فين وإمتى من أي حتة في
القاهرة الكبرى اللي هي عبارة عن محافظات: القاهرة والجيزة والسادس من أكتوبر
والقليوبية وحلوان، وطبعاً من غير عربيات عشان لو حد عنده عربية مش محتاج يقرأ
المقال ده أصلاً، إلا لو كان ناوي يركن العربية ويروح مشوار بالمواصلات لأي سبب
كان.
هـ نقول بسرعة إيه هي وسائل المواصلات الموجودة في القاهرة مع وصف سريع
لطبيعة عملها:
1-
التاكسي : فيه منه 3 أنواع، واحد لونه أبيض وده ليه
عداد بـ يبتدي من 2.5 جنيه وكل كيلومتر بـ1.25 جنيه وده طبعاً سهل تاخده من أي حتة
لأي حتة بس يستحسن تاخده في المشاوير الطويلة عشان في الحالة دي بـ يكون أرخص من
الأبيض في أسود العادي.
النوع التاني هو التاكسي الأبيض في أسود
العادي وده موجود بشكل مؤقت وهـ ينقرض قريب، والأجرة فيه بـ تكون بالإتفاق مع
السواق قبل ما تركب وبعد ما تحدد انت رايح فين، أو بعد ما توصل تديله اللي فيه النصيب
حسب تقديرك للمسافة لو عندك فكرة بالأسعار.
النوع التالت أسمه «تاكسي العاصمة» أو « City
Cab » وده لونه أصفر وبـ تطلبه
بالتليفون على الرقم ده (16516 – 16800) وتحدد الميعاد والمكان اللي يجيلك فيه
قبلها بـ يوم، ولو إتصلت في نفس اليوم هـ تتحط على قائمة إنتظار وهـ يكلموك لو فيه
تاكسي فاضي ينفع يجيلك. بداية الأجرة 3.5 جنيه وكل كيلومتر بـ 1.25 جنيه.
2-
مترو الأنفاق : ليه خطين شغالين حالياً والخط التالت هـ
يُفتتح آخر 2011، والخط الأول (المرج – حلوان) فيه 35 محطة بـ تغطي معظم أحياء
القاهرة وحلوان، والخط التاني اللي بـ يتقاطع معاه فيه 20 محطة (شبرا الخيمة –
الجيزة) وده بـ يمر بمعظم أحياء الجيزة وأحياء محافظة القليوبية شمال القاهرة،
ولما يبدأ عمل الخط التالت (العبور – ميدان لبنان) هـ تكون القاهرة كلها تقريباً
إتغطت بشبكة أنفاق بـ تمر بكل الأحياء. التذكرة بجنيه واحد لرحلة واحدة، حتى لو
غيرت الخط في المحطات المشتركة بين الخطين الأول والتاني وهما محطتين «مبارك» و«السادات»
اللي في رمسيس والتحرير على التوالي. وفيه نص تذكرة للأطفال والعسكريين بـ75 قرش،
وبـ يشتغل من 5 الصبح لحد 12 بالليل في الشتاء ولحد 1 بالليل في الصيف.
3-
أتوبيسات هيئة النقل العام : ودي الأتوبيسات الحكومية العادية اللي بـ
يكون لونها أحمر أو أخضر وفي منها حجمين؛ الأتوبيس الكبير والميني باص، وبـ تكون
مرقمة وكل أتوبيس له خط سير محدد ومحطات بـ يقف فيها، وده بـ يروح كل أحياء
القاهرة الكبرى وضواحيها وشوارعها الرئيسية، بس طبعاً فيه خطوط بـ تبقى زحمة قوي
بالذات في أوقات الذروة، وليها مواقف في كل الأحياء وأهمها في ميدان عبد المنعم
رياض في وسط البلد جنب ميدان التحرير، روكسي بمصر الجديدة، الحي العاشر بمدينة
نصر، المنيب بالجيزة، المسلة بالمطرية، العباسية، العتبة، المظلات بشبرا، العرب
بالمعادي، المرج، موقف ليلة القدر بالسادس من أكتوبر. والتذاكر فيها بـ تبدأ من 50
قرش لحد 2 جنيه حسب المسافة والخط نفسه، وفيه أتوبيسات مكيفة المشهورة بإسم الـ CTA ودي بـ تعدي في ميادين المناطق الراقية شوية بس
الأتوبيسات نفسها إبتدت تتهالك شوية.
4-
الأتوبيسات الخاصة MCV : إنتشرت في آخر 10 سنين بس، ودي شركات خاصة بـ تحرك ميني
باصات وأتوبيسات في كل شوارع القاهرة وبـ تستخدم نفس مواقف أتوبيسات هيئة النقل
العام، وأحياناً بـ تاخد نفس أرقام هيئة النقل الحكومية لو بـ تمشي في نفس خط
السير. تذاكر الميني باص بـ 1.5 جنيه وبعضها مجهز بخدمة إنترنت لاسلكي ممكن
تستخدمها مجاناً، والأتوبيس بجنيه واحد. وبـ يشتغل من 6 الصبح لـ 12 بالليل، والجرا ﭺ بتاع الشركة موجود في منطقة العبور.
5-
الترام : مشهور بـ”ترماي مصر الجديدة” وهو
5 خطوط ونهاية الخطوط موجودة في مناطق: الميرغني والنزهة وعبدالعزيز فهمي وألماظة
ومساكن شيراتون في مصر الجديدة، شارع مصطفى النحاس في مدينة نصر، الدرَّاسة،
رمسيس، المطرية. وللأسف محدش بـ يستخدم الترام حالياً إلا لو مضطر لأنه بطئ جداً
وبـ يتأخر على مواعيده في المحطات، بس لازم نقول أنه بـ يغطي مصر الجديدة كلها
بميادينها زي ميدان “سفير” وميدان “الإسماعيلية”
و”المحكمة” و”ميدان الحجاز” و”هليوبوليس” والـ 3
شوارع الكبار بتوع مدينة نصر “عباس العقاد” و”مكرم عبيد”
و”مصطفى النحاس”، وبـ يعدي على العباسية وغمرة وجامعة عين شمس ووسط
البلد في محطة رمسيس. التذكرة بـ 50 قرش بس، وبـ يشتغل من 6 الصبح لحد 12 بالليل.
6-
الميكروباص: أكتر وسيلة منتشرة لأنها بـ تشتغل 24 ساعة
وليها خطوط من أي مكان لأي مكان وممكن الخط يشتغل على مسافة صغيرة جداً زي شارع
واحد من أوله لأخره، وممكن لمسافات طويلة من مدينة لمدينة، والأجرة بـ تختلف حسب
المسافة وبـ تبدأ من 50 قرش لحد 4 جنيه، ده جوة القاهرة الكبرى كلها، ومفيش مكان
مش بـ توصله الميكروباصات بالذات الأماكن اللي مش متغطية بالمواصلات العامة
والأتوبيسات. ليها مواقف خاصة بيها بـ يطلق عليها “مواقف السيرفيس”
وغالباً بـ تكون قريبة من المواقف الرسمية بتاعة الأتوبيسات، وهـ تعرف خط سير
الميكروباص من التبَّاع اللي بـ ينادي ويقول هو رايح فين، فـ لازم تتأكد قبل ما
تركب وتسأل إذا كان بـ يعدي على المكان اللي انت رايحه ولا لأ.
7-
البيـﭼو الـ7 راكب: غالباً بـ تشتغل بين المحافظات، وبـ يكون
ليها مواقف بـ تحمل الركاب منها، بس في أحياء بـ تشتغل فيها البيـﭼو لمسافات قصيرة
زي خط “العتبة – الأزهر” وبعض مناطق شبرا الخيمة. والأجرة بـ تبقى من 50
قرش لجنيه واحد، ودي وسيلة مش منتشرة قوي عموماً.
8-
التوك توك: إجتاح المناطق الشعبية مؤخراً، التروسيكل
أبو 3 عجلات وكابينة لـ3 أفراد، وده بـ تركبه بنفس طريقة التاكسي؛ تشاورله وتقوله
رايح فين وتركب، وهو مش بـ يمشي إلا في الشوارع الجانبية والداخلية ومالوش الحق
أنه يطلع الطرق الرئيسية والشوارع العمومية، وتوقع أن السواق يركَّب حد تاني معاك لو سكته زي سكتك. فيه بعض
الأحياء الراقية فيها توك توك زي حي الأشجار في مدينة أكتوبر ومنطقة حدائق الأهرام
وده بـ يستخدم عشان يدخل الشوارع الفرعية اللي مش بـ يدخلها أي مواصلات، والناس
عادة بـ تستخدم التوك توك عشان يوصلها لحد باب البيت عشان حجمه الصغير وقدرته على
إقتحام الشوارع والحواري الضيقة. الأجرة بـ تكون جنيه واحد أو 2 جنيه بالكتير،
وطبعاً شغال طول الوقت.
9-
الأتوبيس النهري: طبعاً بـ يمشي في نهر النيل وتابع لهيئة
النقل العام الحكومية. للأسف مش متفعل قوي في حين أنه من السهل ربط المحافظات الـ4
(القاهرة – الجيزة – حلوان – القليوبية) عن طريق شبكة مواصلات نهرية تخفف الضغط
على الشوارع والكباري. حالياً هو شغال في القاهرة والجيزة بس وله محطات قدام مبنى
الإذاعة والتليفزيون في ماسبيرو وفي منطقة المنيل، وفيه مراسي جديدة تحت الإنشاء
في مناطق في الجيزة وحلوان. سعر التذكرة 2 جنيه، وبـ يشتغل في المواعيد الرسمية.
كده إحنا إستعرضنا وسائل المواصلات الموجودة في العاصمة ومواعيد عملها
وتعريفاتها، فيه وسائل مش مهمة قوي مكلمناش عنها زي «تاكسي لندن» و«الليموزين» لأن
دي خدمة فندقية أكتر منها مواصلات عادية، وكذلك «التاكسي الطائر» أو
الهليكوﭘتراللي موقفه في مطار ألماظة الحربي، وطبعاً «الحنطور» المنتشر على
الكورنيش ودي برضه خدمة سياحية وترفيهية.
أهم الأماكن والمواقف لركوب المواصلات العامة :
1- ميدان رمسيس ، وسط المدينة فيه: مترو الأنفاق «محطة مبارك» – موقف
ميكروباصات لكل حي في القاهرة والمحافظات – أتوبيسات عامة – أتوبيسات خاصة – محطة
ترام مصر الجديدة.
2- ميدان عبد المنعم رياض ، بالقرب من الكورنيش وميدان التحرير فيه: موقف أتوبيسات
عامة وخاصة لكل مناطق العاصمة – مترو أنفاق «محطة السادات» – موقف ميكروباصات
مدينة نصر والمعادي والهرم وفيصل وأكتوبر والشيخ زايد – موقف الأتوبيس النهري على
الكورنيش.
3- ميدان لبنان ، المهندسين فيه: ميكروباصات لمناطق الجيزة وأكتوبر –
مواقف أتوبيسات عامة وخاصة.
4- ميدان روكسي ، مصر الجديدة فيه: موقف ميكروباصات المظلات والسواح
والمطرية وجسر السويس – موقف الأتوبيسات لمناطق المعادي وطريق صلاح سالم ومدينة
نصر والمهندسين والدقي – ترام مصر الجديدة – أقرب محطة مترو أنفاق هي “سراي
القبة” و”حمامات القبة”).
5- ميدان الساعة ، مدينة نصر، وهو مش موقف رسمي بس نقطة مركزية بـ يعدي
منها كل المواصلات اللي بـ تروح مدينة نصر وممكن تركب منها لأي منطقة في وسط البلد
وأحياء مدينة نصر ومصر الجديدة والمطرية وعين شمس والسيدة عائشة.
6- موقف الزهراء ، مدينة نصر قبل الحي العاشر، فيه: موقف أتوبيسات عامة
وخاصة لكل أحياء القاهرة – موقف ميكروباصات وميني باصات للطريق الدائري والتجمع
الأول والتجمع الخامس والقطامية والمنيب والمعادي.
7- ميدان عبود ، شبرا المظلات فيه: موقف ميكروباصات لكل محافظات مصر
وبعض مناطق شمال وشرق القاهرة – موقف أتوبيسات عامة وخاصة لكل أحياء القاهرة –
أقرب محطة مترو هي «المظلات».
8- ميدان العباسية منطقة محورية وسط أحياء كتير زي مصر الجديدة والوايلي
وحدائق القبة وغمرة ورمسيس والشرابية وباب الشعرية ومدينة نصر وطريق صلاح سالم
والأتوستراد، وفيه ميكروباصات وأتوبيسات لكل المناطق دي وأماكن تانية زي جسر
السويس والمطرية والمعادي والتجمع الخامس وحلوان. أقرب محطات مترو هي «الدمرداش» و«منشية
الصدر» وقريب هـ يكون في محطة «العباسية» في الخط التالت للمترو.
9- ميدان المطرية من أكبر ميادين العاصمة في المساحة، مخرج ومدخل لأحياء
ومناطق كتير في شمال وشرق القاهرة زي حدائق الزيتون وحلمية الزيتون ومصر الجديدة
والسواح ومسطرد والمظلات والأميرية وحدائق القبة، فيه: موقف ميكروباصات لكل مناطق
شمال وشرق القاهرة – أتوبيسات عامة وخاصة لنفس الأحياء – أقرب محطة مترو أنفاق «حلمية
الزيتون» و«المطرية».
10- ميدان الجيزة ، في حي الجيزة فيه: موقف ميكروباصات كل أحياء محافظة
الجيزة زي الهرم وفيصل والدقي والمهندسين وبولاق ومدينة أكتوبر والزمالك والتحرير
ورمسيس – مترو الأنفاق «محطة الجيزة» – أتوبيسات عامة وخاصة.
احنا في مصر ماعندناش ثقافة الإستعانة
بالخرايط، ومع ذلك الموضوع مفيد جداً خصوصاً في مدينة زي القاهرة، وأخيراً نحب
نقول أن فعلاً مفيش شبر في القاهرة الكبرى مش متغطي بشبكة المواصلات العملاقة دي.
ورحلة سعيدة.
