“فيسبوكية” للمصريين: “مين قال إن اللبنانية هترضى تبص لكم”
انتقدت ناشطة على الفيس بوك تدعى “ناجون حسين”، سخرية الرجال المصريين من اللبنانين، وإعجابهم بالسيدات اللبنانيات اللاتي خرجن في الثورة اللبنانية واللاتي وصفوهن بـ”المزز”، وشاركت بوست يجسد الصورة التي يظهر بها المصري في المنزل، وقالت إن اللبنانيات لن يقبلن بالمصريين وكتبت:
بالنسبة للرجالة اللي عاملة زيطة على الثورة اللبنانية و كاتبين اتقل شوية اللبنانيات قادمات. انا مش هتكلم عن ردود أفعال اللبنانيين علشان الاحراج بس أحب أقولك حاجتين ..
أولا :- مين قالك ان اللبنانيات هتبص لك !!
طيب هتبص لك على ايه يا موهوم ؟؟ يعني المفروض هيعجبها كرشك و لا سنانك الصفرا و لا الصلعة؟ أوباااا اوعى الصلعة .. دي بقى حكااااية !!
انتوا ماعندكوش مرايات في البيت ولا ايه ؟ مش شايف وائل الكافوري و عاصي الحلاني شكلهم ايه (ده انا مش عايزة اتكلم عن الشباب الصغير بقى) ..
تفتكر اللي عينيها متعودة على التفاح المعسل هيعجبها الخيار المخلل!! كان عجب السوريات لامؤخذة ..
احنا بس المصريات اللي نفسنا حلوة او زي ما تقول كده اتعودنا و الأمر لله.
ثانيا :- زي ما اللبنانيات قادمات اللبنانيين برضه قادمون. ولا نسيتوا ؟؟
على الأقل الواحدة منا تتعامل مع شعر مسبسب و عيون ملونة و لسان بينقط شهد بدل المناظر اللي بنصطبح بيها كل يوم الصبح في مصر دي !!
دي الواحدة من دول عايشة مع فانلة داخلية معدية في البيت .. و يرجع يقولك الست مش بتهتم بنفسها ليه ! طيب مش لما تلاقي حاجة تستاهل لامؤخذة !
يالا القصد .. مش عايزة اكمل. ان الله حليم ستار.
صدقوني المقارنة مش لصالحكم خااااالص. ده انتوا لو تعرفوا بيتقال عليكم ايه في قاعدات الحريم كنتوا انتحرتوا من زمان ..
بس احنا مهذبين و عاملين بأصلنا و مش بنرمي الكلام في وشكم علشان يوجعكم .. ولا ليل و نهار بنعمل نكت و صور تريقة زي ما بتعملوا معانا. نراعي ربنا فيكم و نحفظ بيوتكم و نربي عيالكم و نستحمل عصبيتكم و ظروفكم الصعبة اكمنكم غلابة و شقيانين برضه.
**ملحوظة **
مرفق صورة لنموذج الراجل المصري و هو قاعد في البيت.
