مغامرات “رابل إسكوبر” ملك الكوكايين.. من ضمنها حول حصان الى وحيد قرن لتحقيق رغبة ابنته
كتب : سعد القماش
حتى تكون القصة أكثر إمتاعاً، دعونا نتكلم بالعامية:
تخيل راجل كان بيصرف 2500 دولار (20 ألف جنيه) على الأساتك إللي بيلف فيها رزم الفلوس بتاعته، وكان بيعمل أكتر من 420 مليون دولار (328 مليار جنيه) في الأسبوع، من كتر الفلوس إللي معاه كانت الفيران بتاكل من فلوسه 17 مليار جنيه في الشهر (عشان كان بيخزنهم في أماكن قديمة أو مكتومة) ومكانش بيهمه، كان بيعتبرها حاجة رايحة في الهوا (إللي هو حاجة أوسخ من حرق الجوكر للفلوس في The Dark Knight وBreaking Bad بمليون مرة بس في الحقيقة) وكل إللي شغالين معاه بقوا مليارديرات ومالتي مليونيرات، ومن كتر الفجور بنته طلبت منه حيوان أسطوري (وحيد القرن) جاب حصان لزق له قرون وأجنحة وعدل شكله عشان أقتنع إن مفيش حاجة ميقدرش يعملها، ولما دخل السجن عملوهوله جنة، بس برضو هرب منه وواحد من أقوى رجال عصابته قتل أكتر من 300 واحد ولسة خارج من السجن قريب، وكان البوليس بيعتبر أي هجمة عليه أو على أوكاره حاجة كدا زي حرب وبياخدوا له جيش صغير، ولو كتبت قصص من هنا للصبح مش هخلص. أنا بالطبع بتكلم عن ملك الكوكايين وواحد من أخطر وأغنى المجرمين في التاريخ Pablo Escobar. قدر يوصل لكل الفجور دا على الرغم من أصوله المتواضعة بسبب إن الكوكايين سلعة إدمانية جدًا وكمان مكسبها خيالي، يعني لك أن تتخيل أن كيس الكوكايين بيتكلف 1100 جنيه في مكان إنتاجه (أمريكا الجنوبية) ولما بيوصل لك إنت في دولة تانية بيبقى تمنه وصل أكتر من 560 ألف جنيه!
إللي عايز يشوف حاجة درامية نضيفة جدًا عن قصة حياته يتفرج على مسلسل Narcos والحروب إللي عملها، لسة مخلص سابع حلقة منه وأشهد له إنه مسلسل رائع جدًا جدًا حتى لو سايب بعض التفاصيل وببعض النواقص طبعًا، بس في العالم مسلسل عالمي، وعلى الرغم من إني قريت قصته كتير بإستفاضة بس المسلسل برضو ممتع جدًا وبيدي للأحداث والقصة بعد تاني مستحيل تكتسبه من القراءة.
مرة بنته تعبت راح مولع في 2 مليون دولار عشان يدفيها .
كان بيخسر أكتر من 2 مليار دولار شهريًا الفيران بتاكلهم بس مش مشكلة، ولا كان بيفرق معاه، وكان %80 من تجارة الكوكايين في العالم كله معاه و4 من كل 5 أمريكان مدمنين كان الكوكايين بتاعهم منه وفي كان معروف بأعماله الخيرية، بيدي الفقرا فلوس كتيرة، وبيبني مباني للمتشردين، وبنى أكتر من 70 ملعب كرة وحديقة حيوان.
