وزارة الإسكان تبيع الوهم للشباب باسم “شقق محدودى الدخل”

طبعاً ربنا خلق الناس طبقات، طيب ليه الشقق بتاعة الإسكان طبقتين بس؛ محدودى ومتوسطى الدخل؟ أصل بينهما طبقات كتيرة! يعنى محدود الدخل (حسب معلوماتى المحدودة) يبقى مرتبه لا يزيد عن 1750 جنيه وما فوق، كده يبقى متوسط الدخل، يعنى ساوى بين اللى مرتبه 1800 واللى مرتبه 10 آلاف جنيه. هتقولوا أسعار الشقق مختلفة ويبقى عرض وطلب؟.

طيب قولولى أقل شقة لمتوسطى الدخل كام؟ طب وأقل قسط شهرى كام؟ وده طبعاً لواحد مرتبه 1800 طيب بلاش واحد مرتبه 2500 أو حتى 4000 حد يحسبها بقى؟، أعتقد أن أقل قسط هيكون 1700 جنيه/الشهر.

طب ممكن اقتراح إن أول قسط يتدفع يبقى عند الاستلام (وطبعاً الدفعة المقدمة هتتدفع فى معادها عادى).

هل فى ناس كتير ساكنة فى شقق إيجار؟ ومعاها بس تمن المقدم 30 أو 40 ألف ده بفرض أن أقل شقة متشطبة من 150 إلى 200 ألف جنيه بفرض أن المقدم 20%!

يعنى مش لازم يدفع إيجار الشقة وكمان القسط لحد ما يستلم الشقة اللى المفروض أن استلامها هيكون بعد سنة أو سنة ونص.

وفى هذا الأمر أكمل تساؤلاتى، هل ممكن الشقق تبقى طبقات؟، طيب هل ممكن حد يقولنا غالبية المرتبات فى مصر كام؟، طب بلاش.. ممكن عدد الناس اللى مرتبها من 2500 إلى 4000؟ يمكن أنا مش متابع كويس أو غلطان أو مش فاهم أو فيه حاجات مش شايفها، على أى أساس من البداية تم تحديد كل ذلك؟ هل هناك إحصائيات فى مصر عن المرتبات والشباب الذين يحتاجون إلى شقق وإمكانياتهم؟ من المسئول عن طرح تلك المشروعات؟ وكيف تم دراستها قبل الإعلان عنها؟ فى النهاية نجد بعض المستثمرين حصلوا على الشقق بسهولة وما زال الشباب متفرجاً.