السادة المحترمون: الإهمال الطبي يتسبب في وفاة مواطنتين في المستشفى الأمريكي بمساكن شيراتون
كنا اتكلمنا الأسبوع اللى فات والأسبوع ده عن أهمال طبى ادى لوفاه شابه فى مقتبل العمر وهى رشا فرج 27 سنة متزوجة وعندها ابنة 5 سنوات .. ووفاه طفله عمرها 8 شهور وهى ناتالي أمجد أمير .. الاهمال الطبى كان فى مستشفى واحده خاصة وهى المستشفى الأمريكي بمساكن شيراتون .. وعلى فكرة الاثنين دخلوا المستشفى فى يوم واحد .. دخلوا أحياء وخرجوا أموات بسبب الإهمال الطبى ..رشا كانت بتعاني من ورم ليفي على الرحم ودخلت المستشفى لاسئتصار الورم الليفي وأثناء العملية قالوا لأهل رشا احنا فتحنا البطن ومافتحناش الرحم و احتمال لو شيلنا الورم الليفي يحصل نزيف في الرحم وإذا حصل نزيف هنستأصل الرحم فأهل رشا رفضوا وبعدين خرج دكتور تانى قال لهم أن رشا دخلت في غيبوبة ويجب نقلها إلى مستشفى أخرى لعمل أشعة على المخ فعلي ما نقلوا رشا لمستشفى عين شمس كانت توفت و أطباء مستشفى عين شمس قالوا أن سبب الوفاة هبوط حاد في الدورة الدموية نتيجة لنزيف من فتح الرحم ..أما الحالة التانية وهى الطفلة ناتالي أمجد أمير دخلت المستشفى عندها نزلة معوية بسيطة وعلقوا لها محاليل وبعد ساعات من تعليق المحاليل البنت ما نزلتش أى بول وكام يوم وناتالى جسمها انتفخ والاطباء قالوا أنها عندها تسمم ومدير المستشفى قال لأسرة الطفلة الحقوا بنتكم في مستشفى تانية عشان معندناش هنا عناية مركزة وراحوا مستشفى تانية واكتشفوا أن عندها فشل كلوي حاد نتيجة لاهمال المستشفى الأمريكي وقعدت بعدها أسبوع تحت العناية المركزة لكن الحالة كانت وصله متدهوره جدا وتوفت.. يعنى اهمال صارخ من مستشفى خاص .. لا تهتم بحياه الناس .. ولازم يكون لوزارة الصحة موقف حازم عشان كل المستشفيات الخاصة تتعظ .. لان حياة الناس مش لعبه .. احنا معانا صابر غنيم وكيل وزارة الصحة للمؤسسات الطبية غير الحكومية .. عشان نعرف أيه اللى تم مع هذه المستشفى خاصة ان احنا يوم الأحد اللى فات كان معانا دكتور هشام عطا مدير عام المؤسسات العلاجية غير الحكومية بوزارة الصحة فى مداخلة وقال ان التحقيقات اللى بتجريها الوزارة هتنتهى النهارده .. معنا عبر الهاتف الدكتور صابر غنيم – وكيل وزارة الصحة للمؤسسات الطبية غير الحكومية .
تابعونا على https://www.facebook.com/alSadahalMo7taramon
