طول عمر الحركات السياسية وبعض الاحزاب عندها مشكله فى تناول المشاكل المتعلقة بالقضايا والمطالب الاجتماعية .. ليه .. لأنها بتاخد المشكله من طرف وزاويه واحده ..عشان يبانوا انهم المدافعين عن حقوق بعض الفئات عشان تضمها لصفهم من خلال خطاب سياسى منقوص.. لان القوى السياسية دى عمرها ما قدمت حلول للمشاكل .. وبتكتفى بالعرض .. لمجرد انها تثبت انها موجوده فى المشهد .. وهى الحقيقة بتستغل القضايا دى لعمل شو مش اكتر.. يعنى مثلا عمليه نقل الباعة الجائلين اللى كانوا محتلين شارع 26 يوليو وطلعت حرب وغيرها من الشوارع الحيوية للترجمان وعمل أسواق خاصة ليهم كان أمر ضرورى .. لكن النهارده جبهة تدعى جبهة طريق الثورة ارتكبت نفس المشكله فى التناول السطحى للازمات الاجتماعية من خلال قضية الباعه الجائلين وبالتأكيد ده ليه أغراض سياسية و استغلال سياسى لرفض الباعة الجائلين لعمليات النقل .. الجبهة دى استضافت البائعة الجائلين فى مؤتمر صحفى عشان يعرضوا وجهة نظرهم .. وطبيبعى جدا قالوا انهم متضررين وأن الحكومة خدعتهم ونقلتهم أماكن بيقولوا انها مهجور .. لكن السؤال هنا الجبهة الثورية دى مافكرتش تجيب اصحاب المحلات اللى فى طلعت حرب المتضررين من الباعة الجائلين عشان يحكوا عن معاناتهم .. مافكرتش تجيب حد من اللى بيشتغل فى الشوارع دى وبياخد ساعات عشان يوصل شغله .. الاجابة .. لا .. ما فكرتش .. طب هل فكرت جبهة طريق الثورة انها تبادر وتقدم هى حل وخيارات تانية وبدائل ووتتواضع وتيجى على نفسها وتقدم الحل ده . برضه لأ .. بلاش متاجره بقضايا الناس .. عاوزين نبدأ نشتغل بموضوعيه شويه وبلاش اسلوب متاجره رخيص بأحوال الناس.. القوى السياسية والثورية لازم يكون ليها دور فى تقديم حلول للمشاكل اللى بتواجهها .. كشريك اساى فى المجتمع ، يعني مثال تاني قضايا العمال ، خلال العشر سنوات الماضية كان تفاعل القوى السياسية مع قضايا العمال أنها تعقد الأزمة وبيحاولوا يرفعوا سقف مطالب العمال وغيرهم من الفئات دون تقديم حلول عملية يسهل تنفيذها ، لو عاوز تشتغل سياسة قدم خطاب مفهوم وحلول سهل تطبيقهل عشان لوة في يوم من الأيام لو وصلت للسلطة الناس هتسألك على الشعارات البراقة اللي كنت بترفعها هتقولك فين اللي كنت بتقولنا عليه فين ،، اللي على الشط غير ان في البحر – تبنوا قضايا الناس معاكم وهندعمكم بكل قوة لكن دوروا على حلول سهل تطبيقها .
تابعونا على https://www.facebook.com/alSadahalMo7taramon